काठमाडौँ । पेटमा ग्यास जम्मा हुँदा पाद निस्कनु एक स्वाभाविक प्रक्रिया हो । तर, पाद अत्यधिक गन्हाउने खालको छ भने चाहिँ विचार गर्नुपर्ने हुन्छ । बारम्बार पाद आउनु र त्यसबाट कडा दुर्गन्ध आउनु कुनै रोगको सङ्केत पनि हुन सक्छ । यद्यपि, सधैँ यस्तो हुँदैन । 

हाम्रो खानपान, पाचनसम्बन्धी समस्या र केही अन्य रोगहरू पनि दुर्गन्धित पादका लागि जिम्मेवार हुन सक्छन् । त्यसैले, दुर्गन्धित पाद आउनु कलेजो रोगको सङ्केत हो कि होइन भनेर जान्नु महत्त्वपूर्ण हुन्छ ।

बारम्बार दुर्गन्धित पाद आउनु कलेजो रोगकै प्रत्यक्ष सङ्केत भने होइन । यद्यपि, कलेजोले राम्रोसँग काम गरिरहेको छैन भने पेटमा ग्यास बन्ने र पेट दुख्ने समस्या हुन सक्छ । आन्द्रामा ब्याक्टेरियाको असन्तुलन वा ‘इरिटेबल बावल सिन्ड्रोम’ (आईबीएस) जस्ता पाचनसम्बन्धी समस्याहरूका कारण पनि दुर्गन्धित पाद आउने गर्छ ।

• कस्तो अवस्थामा हुन सक्छ कलेजोसम्बन्धी रोग ?

यदि तपाईंको छाला पहेँलो हुँदै गएको छ, पेटको दाहिने भागमा लगातार दुखाइ महसुस हुन्छ र सँगै दुर्गन्धित पाद पनि आउँछ भने यसलाई हल्का रूपमा लिनु हुँदैन । किनकि, यी लक्षणहरू कलेजो रोगका सङ्केत हुन सक्छन् । यसका साथै, पिसाब गाढा रङको आएको छ कि छैन भनेर ध्यान दिँदा पनि कलेजोसम्बन्धी समस्या हो कि होइन भनेर अन्दाज लगाउन सकिन्छ ।

समस्या कसरी पत्ता लगाउने ?

दुर्गन्धित पाद आउने समस्या लामो समयसम्म रहिरह्यो वा माथि उल्लिखित अन्य लक्षणहरूसँगै देखापर्‍यो भने स्वास्थ्य परीक्षण गराउनुपर्छ । तपाईंले डाक्टरको सल्लाहमा कलेजोको परीक्षण, अल्ट्रासाउन्ड, रक्त परीक्षण वा पेटसँग सम्बन्धित अन्य परीक्षणहरू गराउन सक्नुहुन्छ ।

ग्यास र दुर्गन्ध कम गर्ने सामान्य उपायहरू:

• ग्यास कम गर्न सधैँ हल्का र सजिलै पच्ने खानेकुरा खानुहोस् ।
• खाना निल्नुअघि राम्रोसँग चपाएर मात्र खाने बानी बसाल्नुहोस् ।
• दिनभरि प्रशस्त मात्रामा पानी पिउनुहोस् ।
• हरेक दिन मुख्य खाना खाएपछि कम्तीमा २० मिनेट हिँड्ने गर्नुहोस् ।
• कब्जियत हुन नदिने फाइबरयुक्त खानेकुराहरू आहारमा समावेश गर्नुहोस् ।
• समस्या कम नभएमा डाक्टरको सल्लाह अनुसार आफ्नो खानपानमा परिवर्तन गर्नुहोस् । एजेन्सी