काठमाडौं l गृह मन्त्रालय अन्तर्गत राष्ट्रिय विपद् जोखिम न्यूनीकरण तथा व्यवस्थापन प्राधिकरणले देशका विभिन्न भागमा तीव्र हावाहुरी, भारी वर्षा र हिमपातको सम्भावना रहेको भन्दै उच्च सतर्कता अपनाउन नागरिकलाई आग्रह गरेको छ।

जल तथा मौसम विज्ञान विभागको पछिल्लो पूर्वानुमान अनुसार चैत ६ गते शुक्रबार कर्णाली र सुदूरपश्चिम प्रदेशका पहाडी तथा हिमाली क्षेत्रका केही स्थानमा भारी वर्षा र हिमपात हुने सम्भावना छ।

त्यसैगरी, दाङ र नेपालगञ्जसहित लुम्बिनी प्रदेशका तराई क्षेत्र तथा शनिबारदेखि पूर्वी क्षेत्रका विराटनगर, धरान र धनकुटा आसपास का जिल्लामा झण्डै ११९ किलोमिटर प्रतिघण्टासम्मको तीव्र हावाहुरी चल्ने चेतावनी दिइएको छ।

⚠️ सम्भावित जोखिम

• रुख ढल्ने र घरका छाना उड्ने

• कमजोर संरचनामा क्षति

• विद्युत तथा सञ्चार सेवा अवरुद्ध

• सवारी दुर्घटनाको जोखिम

• मानवीय क्षति (मृत्यु/घाइते)

पछिल्ला केही दिन यस्तै हावाहुरीका घटनामा परेर मानवीय क्षति समेत भएको प्राधिकरणले जनाएको छ।

🛑 प्राधिकरणको आग्रह

प्राधिकरणले नागरिकलाई विशेष सावधानी अपनाउन अनुरोध गर्दै भनेको छ—

• अत्यावश्यक काम बाहेक यात्रा नगर्नु

• हावाहुरी चल्दा घरभित्रै सुरक्षित रहनु

• झ्यालढोका राम्रोसँग बन्द गर्नु

• आगोका स्रोतहरू बन्द गर्नु

• सवारी चलाइरहेको अवस्थामा सुरक्षित स्थानमा रोकिनु

• भीडभाडमा नआत्तिनु, सुरक्षित स्थानतर्फ विस्तारै सर्नु

🚫 विशेष चेतावनी

• अग्ला रुख, बिजुलीका खम्बा र तारमुनि नबस्नु

• लत्रिएको बिजुलीको तार नछुनु

• हावाहुरीका बेला विद्युतीय उपकरण प्रयोग नगर्नु

• जोखिमयुक्त स्थानबाट टाढा रहनु

प्राधिकरणले मौसम पूर्वानुमान नियमित रूपमा हेर्दै आवश्यक सतर्कता अपनाउन सबैमा आग्रह गरेको छ।